أزيك
خايفه اخد قرار ارجع اندم عليه طول حياتي
بجد خايفه اوي ماهو بردو الانسان مش بيعيش غير مره واحده بحياته
فلازم تكون صح
الاجازه ممله بجد مفيش جديد غير النووم اللي كنت محرومه منه طول فتره الدراسه
بجد بنام كتير جدا جدا بس لما تطلب بسهر محدش بيقوللي انتي بتعملي ايه؟
مش عارفه حاسه بفراغ كبير اوي ولما بنام بقوم وقلبي مقبوض وخايفه من ايه مش عارفه؟
وكمان مش بعرف انام كويس لازم اقوم وانا قلبي واجعني وخايفه
يمكن لاني بعيده عن حياتي اللي بحبها بس انا محتاجه للهدوء
بس زهقت بجد
كنت بفكر احفظ قران وكده بس مش عارفه المحفظه اللي كنت بحفظ عندها
مشغوله بس مش سبب اني محفظش بردو
بفكر اعمل تغيير بحياتي ايه هو مش عارفه بس
مش عارفه ليه لازم دايما اي خطوه متبقاش في اولها مني
لازم من الطرف التاني يعني السنه اللي فاتت
عشان احفظ قران كانت المحفظه لازم تعدي عليه عشان اروح معاها غير كده اكسل ومروحش
السنه دي في شهر سبعه هروح باجوش حلمت بيه حلم معرفش ربنا يستر وارجع سليمه
حلمت ان الطريق كله حوادث ومشاكل ولما وصلت غرقت وملك الموت سحب روحي وحسيت بخنقه كبيره
اوي وانا نايمه ووقتها افتكرت ريهام لما سحبت فلوسها وقولت يارتني سمعت كلامها
مش عارفه يمكن والله بجد انا ناويه لما اطلع المعسكر ده اني مغضبش ربنا في اي
شئ وعلى قد ما هقدر هحاول احافظ على نفسي واكون ملتزمه بجد
نفسي ارجع تاني اكون ملتزمه دينيا بجد اشتاقت لخشوعي وخضوعي وذلي بين ايد ربنا
واني بجد مليش حد في الدنيا ديه غيره بجد انا اخدت انذارات كتير بحياتي وخايفه اموت
ونفسي في حد يكون قريب مني ويسمعني ويقرا كلامي ده ويقف جنبي
بجد تعبت من نفسي
والله انا مش وحشه اوي كده بس بجد تعبانه من بعدي عنك ياربي
حاسه اني بقيت جاحده اوي
والله بحب ربنا بس انا ضعيفه
ايه مشاكلي مع ربنا؟؟
اول حاجه الشيطان بينيمني كل ما يحس اني هعمل طاعه يخليني اكسل
تاني حاجه الصلاه مش راضيه عن صلاتي بجد
القران تقريبا من رمضان ممسكتهوش غير مرات معدوده
اوقات بتغر بنفسي وبحس اني ياما هنا وياما هناك
وانا ياعالم بيه ربنا راضي عني ولا لاء
ماما وبابا علاقتي بيهم مش وحشه بالعكس بس بحس ان في تصرافاتي حاجات غلط
ممكن تكون دلع وهما مش بيزعلو مني بس ممكن تكون ذنب
يعني لما ماما تطلب مني اعمل حاجه ممكن معملهاش
كسل عند مش عارفه بس بجد مش بكون قاصدي اعصي امرها بس بكسل
كمان هي عارفه اني مش متعوده عل الشغل او اني اتعب نفسي
وخصوصا لما اكون قعدت فتره مش بعمل حاجه
خالص في البيت بحس انه حمل على قلبي
المشكله الاكبر بقى اني بضيع وقتي يااما في التليفزيون او النوم او التفكير
كمان ممكن اتفرج على مسلسلات مدبلجه بتعرض قيم غير قيمنا وبتعاطف معاها
ممكن ترسخ جوايا حاجات وحشه يعني اني استصغر الذنب مثلا
وده لوحده كبيره
انا عارفه اني بعد ما كتب الكلام ده شوشو هياخدني من ايدي وينيمني ويشربني اللبن ويغطيني
ويقولي انتي احسن من غيرك شوفي البنات بيعملو في نفسهم ايه
ده انتي كده تمام انتي اللي محبكاها
بجد زهقت منه يارب يبعد عني بقى
والمشكله التاينه بقى تلاقي شوشو السوسه ده يعرف اني هعمل طاعه معينه مثلا يخلني استبدلها بطاعه تاني اقل منها
في الدرجه زي دلوقتي كده المفروض اقوم اصلي الفجر حاضر
يقوللي لا فوئي صلاه ايه اكتبي شويه وفضفضي
ده الرسول قال حتى يتبين الخيط الابيض من الاسود
وعيشي بقى للصبح وافوء على صلاه الظهر كده
هههههههههه
مش بضحك بس نفسي اصرخ بجد نفسي حد يقويني ويقوللي فوئي ويمسكني يربطني ويفضل يضرب
فيه لحد ما افوء من الوهم اللي بعيشه بجد
معلش هقوم اصلي وارجع تاني اشوف هعمل ايه مش باين عليها نوم النهارده
اه نسيت حاجه لبسي من الحاجات اللي بردو مش راضيه عنها
الغريب بقى ان ناس كتير تقوللي لبسك معقول بس مش هو الزي الشرعي اللي المفروض البسه
يارب اهديني
