بكره هروح كليه حقوق "مسابقه
طبعا مش شعر أنا تقريبا بطلت ألقي شعر
بعد اللي حصللي يوم هندسه
مش ضعف مني بس قررت اني احترم قلمي شويه
أنا رايحه معاهم بدل المشرفه
هههه
عشان هي تأجز يوم
المهم أنا بمزاجي موافقه
الكليه هتعمل حفله عيد الام يوم
الاثنين الجاي المفروض أنا اللي هقدم الحفله
بس مشكلتي اني مش بعرف اعمل أو أقول شئ مش حاساه
يعني بصراحه معنديش استعداد أني اقول لحد ماما
غير أمي بس
وخصوصا العميده لاني بجد مش بستريحلها خالص
مش عارفه ليه
ومش بعرف امدح حد وأنا مش حاسه الكلام اللى هقوله
عموما هحاول اكتب وخلاص لاني مضطره
بس مش من قلبي الكلام
كان نفسي اروح التربيه العملي بكره في ليسيه الحريه
بجد الاطفال وحشوني موت
وخصوصا مهاب خطيبي وبلال
وحشوني موت بجد
الاسبوع اللي فات اتفاجأت بيهم مخاصمين بعض
زعلت اوي سألتهم ليه متخاصمين طلعت انا السبب؟
شفت
هههههه
مهاب بيحبني وقال لمامته انه عايز يتجوزني
مامته قالتله خلاص في عيد الام هجبلها خاتم وهخطبهالك
بلال راح قلد مهاب وقال لمامته بردو
الموضوع وصل لميسات الكلاص الاساسين
وكمان للمعيده بتاعتي
وكنت حديث الليسيه
الموضوع بجد مضحك جدا جدا
انا والله بحبهم اوي اوي
وحنينه عليهم اوي اوي
بحس انهم بجد حته مني
شئ جوايه بيربطني بيهم
لما بشوفهم بحس بطعم تاني للحياه
وبنسى اي ضغوط أو مشاكل عندي
وبموت فيهم كمان ونفسي لما يكون عندي ولاد يكونوا
زيهم كده وبيحبوني اوي كده
الشئ اللي هزني اوي
لما لقيت مهاب بيقولي ميس بليز ممكن تنزلي شويه
نزلت
قام بايسني وقالي تتجوزيني ياميس
شيلته وحضنته اوي
وفضلت ألف بيه في الكلاص
بجد كنت فرحانه اوي مش من الكلمه بس من الولد
هو قد ايه بيحبني
وطول اليوم فضل يأكلني الشيبسي والشيكولاته بايده
وساب صحابه وفضل قاعد جنبي وانا بشرحلهم وماسك ايدي
وخايف عليه
طبعا ساراصاحبتي كانت بتزعقلهم و
كانت متنرفزه من المهزله اللي بتحصل في الكلاص
بس هما بجد كانو جادعين وكانو بيقعدو ساكتين بالرغم
انهم حوليه ومش ملتزمين بأماكنهم
بس كانو قلبهم عليه عشان محدش يزعقلي بسببهم
بجد قد ايه هما اطفال زي السكر
بجد احساس جميل اوي
طلعتهم الجاردن وفضلنا نجري ورا بعض
كان بجد يوم جميل خالص وكنت سعيده جدا وقتها
بجد الحب احساس جميل اوي
ايا كان من كبير او من صغير
متغرش اوي كده دول مجرد اطفال
بس أطفال بيحبوني بجد من قلبهم
بجد مش عارفه ازاي هستحمل اني ماأشوفهمش بكره بجد
صعب اوي بس هحاول اروح
ولو خمس دقايق باي طريقه ابوسهم وامشي
بجد هما وحشوني اوووووي
وانت أكيد وحشتني بس مش اوي بس
اوي و أوي وأوي وأوي
No comments:
Post a Comment